التحديات

التحديات، الحواجز ، التعامل مع الشخصيات الصعبة ، التحديات في الشغل ، الازمة المالية ، زحمة المرور، ركنة العربية ، التعليم ، الصحة ، ازاي اقدر اعدي فوق كل التحديات دي ، ازاي اعيش اللي بصلي بيه ،. كثير بنقول كلام حلو و كويس وعندنا فهم كتابي لكن لما بنعدي بوقت صعب بنشعر بالفجوة بين اللي بنصليه و نتعلمه في الكتاب المقدس و بين اللي بنعيشه ، احيانا بتبقي المواقف قاسية و صعبة علي نفسياتنا و التحدي كبير و وقتها بنكتشف ان لما الامر بيمس حياتنا الشخصية بنبقي حقيقين و بنلاقي نفسنا مش قادرين نعيش اللي بنقوله و بنبدأ نشعر بوجع الناس اللي حوالينا، و جوانا كل الاسئلة ازاي و ليه أنا ؟ و مش فاهمين دي بيحصل ليه؟ وقتها بنشعر اننا مش فاهمين ربنا و بنبقي زي فراخ النسر اللي وقعت من العش ، بعقلنا فاهمين ان ربنا بيعلمنا حاجة و متمسكين بوعود الرب و منتظرين الانقاذ لكن بقلبنا جوانا خوف و هم و بنقول هنعمل ايه و يبدأ وقتها الصراع بين العقل و القلب؟ و الايمان و العيان؟ و الخوف و الثقة ؟ وقتها بنقول يارب اسمع صراخي و اسمع شكواي و شوف بعينيك الظلم اللي انا فيه ، مصدقين ان عندك حل لكن في نفس الوقت بنقول امتي هتتحل؟؟ الانتظار صعب ، و بتبقي في حالة ترقب هتتحل ازاي و لو متحلتش هنعمل ايه ؟ و تبقي مستنزف نفسيا و طاقاتك مش عارف تلمها ، بس برجع و اقول انا بحب الرب قوي ، حتي لو متحلش انا بحبه و عايزه في حياتي ، مرات كثيرة بفكر ازاي الناس اللي في الكتاب المقدس اللي عدوا في حياتهم بأوقات صعبة عدوا في الوقت دي ازاي ، ازاي يوسف قدر يعدي في الضغطة النفسية ، ازاي دانيال لما اترمي في جب الاسود قدر يعدي و مشاعره كنت ايه في الوقت دا ؟ و يفضل الصراع مستمر في الصلاة لحد ما الرب يرفع معنوياتنا و نقدر نشوف الامور بتتغير و الروح القدس يقوينا و يساعدنا و بعدين نشوف الامور بتتغير في الواقع.